هـام لجمييع الاعضـاء : تعديلات لتصحيح حـال منتدانا الفني ..( لمنتدى خالي من الصمت)

نظراً لما تكرر لدينا من شكوى ..
ونظراً لكثره التنبيهات والايقافات التي طالت الاعضاء بسبب ذات الموضوع
فقد تقرر من اداره الاقلاع في المنتديات الفنيه انزال هذا الموضوع ليكون بمثابة تنبيه أخير لما يجري مؤخراً ..
وهذا الموضوع عام وشامل لــ (جميع الاعضاء بدون استثناء )
القديم منهم والجديد .. برتبه او من دون رتبه ..

*|| لـ أصحاب المواضـيع :
- تكرر مؤخراً حركات " طرد الاعضاء من المواضيع " و الردود من شاكلة " اذا مهوب عاجبك الفنان وراك تدخل الموضوع " ..
- الردود من شاكلة " انت اكبـر حاسد وحاقد لأعظم فنان في المجره " و حركات " موتو بغيضكم يااهل الفنان الفلاني "
- الردود من طقه " القافله تسير و ... تنبح " << بزعمه الحين محترم العضو يوم حط فراغات
- ردود ومواضيع المقارناات بين الفنانين وزج الاسماء اعتباط من دون اي صله له بالموضوع.
**

*|| لـ أصحاب الردود :

- حركات " اوف انتم للحين تسمعون هالفنان "؟ ولا " مع احترامي لكن هالفنان صوته خايس " .!
- ردود " فلان وعععععععععع " .. بالله ؟! لا يكون مطرش قدامك بس ؟!
- الردود مثل " الله يرحم ايامك يافلان كنت احسن واحد الحين انت ماتسوى شي " ويمشي .. يعننه الحين قال شي قيّم مره ..
- ردود الفزعات وصح لسانك ياصديقي يوم فشلت هالعضو ووقفت معاي ..
- ردود ترا هالفنان مثل النصر ولا مثل الهــلال ..!
- ردود تصفية الحسابات وتذكر قبل 15 يوم ، يوم تقولي ان فناني فاشل؟ ترا هالالبوم فنانك افشل ! وانت منقهر مني من يوم مافاز الانتر على فريقك ذاك اليوم .. والحين جاي تردها ..!
- الردود اللي من انت عشان تنقد فناني ووش خلفيتك الموسيقيه يوم تنقد ؟
- الردود الي من نوعية ( من شفت صورة فنانك في الرمزيه غسلت يدي ) ؟
- التواقيع اللي فيها تعرض للفنانين راح يكون لها تعامل غير
- العضو المتشنج هذا بنوديه للحاير اذا بدا يطامر في المواضيع ويخربها
- اللي بيجي ويقول الفنان الفلاني جمهوره واغانيه للمراهقين يحتفظ بالكلام لنفسه ولايسوي انه من جيل ام كلثوم وحليم
- لاحد يجي مدرعم ويجلس ينقد الالبوم وهو ماسمعه بس جاي يستظرف لانه يكره هالفنان
وهالاساليب عارفينها وعارفين اليوزرات اللي تكتب هالنوعيه

كل هالمخالفات وماشابهها بيكون معها تعامل خااص جداً ..
في السابق كنا نكتفي بالحذف حتى مع تكرر الغلط ..
الحين للاسف اذا كاان صاحب الموضوع هو اللي يرتكب المخالفات او يكون من اللي " يشعلون " الموضوع و يولعونه ..فـ موضوعه بيتقفل .. ( اذا الاعضاء بدوا يشطحون ويستهبلون وماتبي موضوعك يتقفل ، الله لايهينك ارسل رساله لأحد المشرفين ينتف ردودهم اذا هي فعلا تستاهل )..

اذا كانت المخالفات صادره من الاعضاء وردودهم بيتم ايقاف العضو لمده وقدرها .. وكل مازود في العيار تزيد مده التوقيف .. وماعندنا اشكاليه نلجأ لنتف الريش !

يجب على كل الاعضاء بدون استثناء .. سواءاً ااصحاب الردود او المواضيع تقبل اي نقد يجي للفنان اللي يتكلمون او يكتبون عنه .. لا يتوقعون بس ردود تمدح .. لأن اكيد في ردود تذم و تذب .. وداام هالنقد والذب في حدود الفن و الاحترم التام لمن يقرأ فهذا شي طبيعي ومسموح ..
الفن مهوب كوره يوم تجون تطبقون عليه نظام انت معي والا ضدي
الفنان ملك لكل المستمعين ويحق لهم ينقدونه ماهو لك لحالك..
مسأله ان كل واحد بيجي يسوي زحمه لأن فيه عضو نقد على فنانه " فنياً " بنقوله دور على منتدى ثاني ولا رح لمنتدى فنانك بتلقاهم كلهم يريشون فيه ... والا " شكلياً" قال عنه يابو كرشه والا قال يابو حب شباب و جايين تشتكون لييه ياربيه يقول كذا عن فناننا اللي احسن واحد في درب التبانه .. بنقولك يالحبيب لو فنانك مايبي احد ينقده ماطلع يورينا حلايا وجهه في التلفزيون .. النقد اللي يمس العرض والكلمات النابيه و الخارجه عن اطار الذوق العام بينعطى للعضو الكاتب له مخالفه..
أما اذا تعدى احد الاعضاء هالحدود وصـار النقد و الذب على العضو نفسه .. فهنا لا يضمن وجوده الفتره المقبله في المنتدى الفني ..!

الاحترام بين الاعضاء نتمنى انه مايفقد حتى لو تماعطوا فنانينهم بالشوش .. او حتى لو وصلت نقاشات الاعضاء لاعلى مرحله .. احترامنا للاشخاص يدل على احترامنا لأنفسنا و يعكس مدى رُقي افكارنا ..

الفني ماهوب استراحه ترمي الكلام اللي تبيه و تهزأ اللي تبي وتمشي ..
ولا هو ملك لك او لأحد من اهلك تطرد اللي تبي منه و تشرشح فيه الاعضاء
تحيتي سكورا

منتديات سمو انمي